Сёння ў Каталіцкім Касцёле адзначаецца свята Узвышэння Святога Крыжа. Для каталікоў Нароўлі — гэта асаблівае свята, бо мясцовы касцёл носіць тытул «Узвышэння Святога Крыжа». Таму ў гэты дзень вернікі збіраюцца разам на святкаванне парафіяльнага адпуста.

Наша асаблівая ўвага звернута сёння на крыж як на знак нашай веры, знак нашага збаўлення. Але таксама мы павінны ўзірацца на крыж як на прыладу ўзвышэння Сына Чалавечага Езуса Хрыста, нашага Збаўцы.

Разважаючы над укрыжаваннем Хрыста, мы ўсведамляем, што з аднаго боку крыж з’яўляецца сімвалам болю, цярпення і мучаніцтва. Але з іншага боку, крыж з’яўляецца знакам паяднання, спакою і любові, знакам перамогі – у крыжы і на крыжы Бог найбольш выразна паказаў, як моцна Ён любіць кожнага чалавека. Людзі будуюць масты – вялікія і малыя, каб без праблем пераехаць ці перайсці на другі бераг. Можна з упэўненасцю сказаць, што Хрыстовы Крыж з’яўляецца менавіта такім мостам, які злучае Неба і зямлю, Боскія справы са справамі чалавечымі, – таму крыж становіцца месцам паяднання паміж Богам і людзьмі.

Свята Узвышэння Крыжа нагадвае нам, што вучань Хрыста павінен сур’ёзна прыняць вучэнне Боскага Настаўніка, каб праз крыж дасягнуць хвалы неба. Знак крыжа тысячагоддзямі з’яўляецца натуральным і ў нашым беларускім ландшафце: крыжы нашыя продкі заўсёды ўстанаўлівалі на перакрыжаваннях і ўздоўж дарог, на вежах касцёлаў і цэркваў, капліцаў і прыдарожных алтарыкаў. Гэтая традыцыя аднавілася за 30 гадоў адраджэння хрысціянства ў Беларусі. І адметная наша Радзіма тым, што ў многіх мясцовасцях сустракаюцца крыжы праваслаўнай і каталіцкай традыцыі ўстаноўленыя побач як знак прыналежнасці да аднаго і таго ж Збаўцы, як знак мірнага суіснавання паміж канфесіямі.

Сёняшняе свята нагадвае, што Гасподзь прагне, каб мы ахвотна ішлі за Ім. Ісці за Хрыстом азначае несці крыж – крыж сваіх штодзённых абавязкаў, заданняў, крыж паклікання, крыж навучання, працы, крыж, які часта даводзіцца несці ў адзіноце. Несці свой крыж цярпліва, цалкавіта давяраючы Збаўцы, бо Ён заклікае нас да збавеннай вандроўкі з Ім: «Калі хто хоча ісці за Мною, няхай возьме крыж свой і ідзе за Мною».

З благаслаўленнем,

Ксёндз Януш Чарнамораўпробашч парафіі Узвышэння Святога Крыжа ў Нароўлі