З 22 па 25 лістапада ў межах дабрачыннай акцыі дапамогу ў выглядзе прадуктовых набораў атрымалі: шматдзетныя і апякунскія сем’і; сем’і, якія выхоўваюць дзяцей інвалідаў; інваліды і пенсіянеры.
З дабрачыннай мэтай мясцовы святар разам з валанцёрамі Дабрачыннай Каталіцкай Місіі «Карытас-Міласэрнасць» наведалі грамадзян як у Нароўлі, так і ў вёсцы: Аляксандраўка, Свяча, Дзямідаў, Антонаў, Грушаўка. У выніку, дапамогу атрымалі больш за 60 чалавек розных катэгорый.
Гэта ўжо чарговая дабрачынная акцыя ў гэтым годзе, якую арганізоўвае каталіцкая супольнасць Нароўлі ў супрацоўніцтве з Дабрачыннай Каталіцкай Місіяй «Карытас-Міласэрнасць».
Сaritas не з’яўляецца для Касцёла формай грамадскай апекі, якую можна даручыць каму-небудзь іншаму, але належыць да яго натуры, з’яўляецца неад’емным выяўленнем яго сутнасці.
Хрысціянская праграма — праграма Езуса — гэта “сэрца, якое бачыць”.
Такое сэрца бачыць, дзе патрэбна любоў, і дзейнічае адпаведна. Любоў да бліжняга з’яўляецца таксама шляхам да сустрэчы з Богам, а закрыванне вачэй на бліжняга робіць чалавека сляпым таксама і на Бога.
У Бібліі падкрэсліваецца непарушная сувязь паміж любоўю да Бога і любоўю да бліжняга. Адна патрабуе другой так моцна, што сцвярджэнне аб любові да Бога робіцца хлуснёй, калі чалавек абыякавы да бліжняга або яго ненавідзіць.
“Бог ёсць любоў, хто жыве ў любові, той жыве ў Богу, і Бог у ім” (1 Ян 4, 16). Словы з Першага паслання св. Яна вельмі яскрава выражаюць сутнасць хрысціянскай веры: хрысціянскі вобраз Бога, а таксама вобраз чалавецтва і яго лёсу.
Святы Луіджы Арыёна казаў: «Рабіць дабро заўсёды, рабіць дабро ўсім, а зла нікому і ніколі».
Ксёндз Януш Чарнамораў пробашч парафіі Узвышэння Святога Крыжа ў Нароўлі
